AL.Zainabeya

بدأنا نفهم بعض..

Wed, 14 Mar 2007 19:08:09 GMT

السلام عليكم ..

أمممممم .. !

بما إن الكل صار يشوف سبيسي " بنات صفنا" .. فأتمنى هالموضوع تقرأونه من بدايته لنهايته ..

اذا بنرجع لأول فصل دراسي .. بتقولون لي انه كريه لانه كنا بعيدين عن بعض ، وكل وحدة تستحي من الثانية ..

ثاني فصل بتقولون انه مميز ، لانه بدينا نفهم بعض ، وثالث فصل صرتوا تقولون عن نفسكم متعاونين وقلوبكم على بعض

وإنكم من أفضل الصفوف اللي تتوحد على كلمة واللي أخلاقهم وتعاملهم ودراستهم مافيه منها ..

أما بالفصل الرابع "الحالي" .. صرنا صدق فاهمين نفسنا عدل ، عرفنا إنه احنا نحب بعض بدافع المصالح لا أكثر

بدأنا نعرف قيم بعض ، صرنا نعرف زميلاتنا الي شاركونا فصول وهم جنبنا شلون نتعامل معاهم بالفصل الرابع ..

عرفنا نحل مشاكلنا عن طريق المشرفة أسماء .. وعرفنا أكثر شلون نفكك علاقة الصداقة بأشياء تافهه جدًا ..

بدأتوا تتغافلوون عن معاملتكم لبعض ، عدمتون الإحترام ،وصارت مسميات "حمارة وزفتة" شيء عادي بالنسبة لكم ..

اليوم .. وللأسف ما توقعت هالتصرف يصدر من بنات الصف! يشتكوون على البنااات على سالفه المكيف!! على سالفه فتحوه وصكوه!

أسألكم بالله ،لما رحتووا واشتكيتوا ليش حددتون أسماء ..شبفيدون؟ وليش بالذات فاطمة علي وفاطمة عبدالله

مع إنكم نفسكم كنتوا تشاركوونهم الكلام عن المكيف ، وليش بالذات حددتوا الفئة اللي تقول انها دايم بردانين ..

عبالكم بس أنتوا تحسون بالحر ولا بس هم يحسون بالبرد؟ ما بتراعون اللي مريضة واللي سكلر والي زكام والي الهواء كله يكون عليها ..

هذا التعاون اللي بينكم ؟ ولا هذا أسلوبكم لحل مشاكل الصف ؟ تشتكووون عند المشرفة!!!

ولا السالفه الثانية إنه بس فاطمة علي وفاطمة عبدالله يمزحون ويضحكون في الحصص ، وانتوو نسيتوا نفسكم؟؟ تاكلون وتعلجوون وتدرسون من ورى ظهر المعلمة!

كل هاي نسيتونه لما هم يتكلمون !

أكو أني أتكلم وأمزح وأطلع عن جو الدرررس نهائيًا ، ليش ما إنقال إسمي ! ولا بس هذول؟

شفتوا شقد بدينا نفهم بعض؟ .. لا إحترام ولا تعاون ولا حتى تستاهلون إنكم تكونون زملاء فما بالكم بكلمة أصدقاء!!

اذا نسيتوا تصرفاتكم أذكركم شقد عاندون معلمة أمينة في أول فصل وتمينا ساكتين ، وشقد عاندتون ومصختوونها مع معلمة معصومة بثاني فصل ، وفي ثاالث فصل حدث ولا حرج! .. بحصة السفر والقصد والانج مسخرة .. وفوق هذا ألحين جايين تحطوون حرتكم في هالفقاره؟

وأذكركم بشغلة سخيفة دامكم تعديتوا حدودكم // سالفه خليفة كلش كريهه بالصف .. يازعم بتسون نفسكم سياسيين قدام المعلمة ؟ بس تسبون ولا تدرون بالدنيا ..إذا نسيتوا هالشيء فياريت تذكرونه عدل..

لأنه مثل ما اشتكيتوا على البنات، يمكن بعد توصل هالشكوى لمشرفتكم صاحبة الإذن الوحدة..

وكله صووب وكلامكم عن المعلمات صوب .. إنكم تحبون معلمة مرضية هذا شي راجع لكم ، بس ليش الحقد على المعلمة الي تكون بديلة لها؟

إنكم تستغلون طيبة معلمة سحر هارون ..وفي النهاية بكل بساطة، معلمة ما فهمنا ،معلمة ما بنقدم الإختبار ،معلمة ما أسمع ،معلمة كله فوضى ..

وهاي غير الأكل والعلوووج . . يا زعم بتسون نفسكم عناتر؟ على شنوو يا حسرة؟ !!!

هاي يبين عدكم إحترامكم وتقديركم للمعلمة الي تشرح ، على الأقل هي معلمة وأثبتت وجودها في المجتمع .. أما إنتو؟؟ فخزانات أكل لا أكثر ..

واستغررررب من الي تقووول تحب معلمة سكينة وجدي إهمالكم لها .. والله العظيم ما تستاهلون أحد يشرح لكم نفسها ...يازعم كل وحدة بدأت تزين دفترها وتعدله ،والتعاااامل صفررررررر

ولا معلمة العربي .. كل شي ما عجبكم بالدرس خليتونه عليها انه ما تبتسم ؟ طيب انتون بتفهمون الدرس بإبتسامتها ؟

ولما ما تفهمون ليش ما تسألون؟

تطنزون على فضيلة انها كله تسأل ،على الاقل ما تقعد وهي مو فاهمة ،وتاخذها حجة على المعلمة انها ما تشرح ..

المعلمة تشرح بس بطرييقة غير على الي تعودنه عليها ، لكل عقولكم هي الي ما تستوعب هالشرح ،لأنكم بعدكم تعقدون مقارنات بينها وبين معلمة أميرة ومعصومة ..

والله العظيم الأغلبية طاحوا من عيوني اليوم .. والله يسامحهم ..

في عدادات اليائسين!

Sun, 25 Feb 2007 13:39:37 GMT

السلام عليكم ...!

ما أعتقد أحد بالدنيا سمع بـ عدادات اليائسين ..!

كل اللي مثل حالتي فهم بهاي العدادات! .!.! هه ، هاي إذا في أحد نفسي!

أممممم .. بدينا فصل جديد ، موادنا الحمدلله أوكي ،ومعلماتنا نفس الشيئ زينين ..

امممم مآسي كانت نهاية الاسبوع كنت امبي آخذ مواد ذاتية فيعني ما انقبلت فيهم وووو حاله يعني صياح ومدري شنو ع الفاضي ..

المهم ..

أني توني جايه من المدرسة ومتهاوشة ويه هالمعلمة الفاضلة المحترمة فاطمة الشكر! على سبب تافه نفس وجهها ..

بعد الهوشة ..

يعني هي كانت تشرح وتقول لنا اذا سويتوا حركة هالجمباز وخليتوا راسكم تحت بألمكم وجدي .. فاني من حسن نية قلت لها صح ..!

ما أشوفها الا زفتني وشرشحتني قدام البنات كامل! وهناك معلمات جدد مال التريننغ مال الجامعة ..

والله قهرتني قلت هالكلمة بقصد انه صدق بألمنا راسنا لو سوينا جذي .. وبهدلتني على هالحالة ..

وتالي كملنا هالحصة ،وبالخطأ رباب حمّاد طاحت على إيدي فألمتني وسكت ..

وردت جت لي هالمعلمة المحترمة ،وتقول لي سوي التمرين ،قلت لها إيدي تألمني ،وأني ما أمبي أبين لرباب انه تألمني عشان لا تنحرج .. ما اشوفها الا تسوي لي عيارة وفاضية وتحسبين هاي مو حصة وهرار ..

والله العظيم قهرتني عدل وأحس نص ألم إيدي من صراخها ..

بعدين لبسنا مراييلنا ورحنا الصف وكان علينا اكاونت وأني كلش الألم ذابحني وأخاف اقول للبنات وتنحرج رباب ..

بعدين ما استحملت ورحت للمشرفة عشان تتصل للبيت يجون يودوني المستشفى ..

فجت منى اختي ورحنا البيت ..

ما كان لي خلق أروح المستشفى فسيدة نمت!

وألحين قعدت وللحين تألمني ، ما أدري وش أسوي ..

منقهرة حدي وما ليّ خلق أقابل وجهها بعد ..

أيام كريهه حدها

Sun, 21 Jan 2007 09:25:09 GMT

السلام عليكم ..

شخباركم؟

مأجورين

أممم طبعا من زماااان ما كتبت يومياتي .. أممم ما أحد مبتلي في هالدنيا كثرري! ..

كل يوم يمر علي أحسه مغامرة .. وكل يوم يمر يكون أصعب من قبله .. مشاااااكل ومرض وإمتحانات ضغووط نفسية فضيعة ..

آه .. بعد ما انتهى الفصل الثاني ، توقعت بكون هالفصل افضل ، بس طلع ألعن منه !

بذاك الفصل موادنا شوي تحتمل والمشاكل نوعا ما طفيفة وفي يومها تنتهي ..

أما هاي الفصل يالله! كل يووم فيه مشكلة كل يووم أصييح صياااااح كل هالسنين من هالصبر..

وصلت إلى مرحلة الضعف ..لأني خلاااااص مستحيل أتحمل هذي الحياة .. أياااااام كريهه جدا جدا ..

إذا ببدأها من أول يوم فأنتو أدرى بشنو قابلت هالفصل، بمواد ما توقعتها بمعلمات ما توقعتهم بفصل ما مجهزة نفسي لأستقباله ..

ياريت كان هالأمر بس الي خلاني اكره هالفصل ، مشاكل صفنه الكريهه السخيفة بكل معنى الكلمة .. وللأسف هذي أول مرة بذكر أسماء البنات الي يا ليت ياليت اذا شافوا هالبلوق ما يسلمون عليّ ولا حتى يعبروني بكلمة ..

" ليلى مهدي + زهرة هيات +زينب عبدالعزيز +زينب مسعود" هذي الفئة اكرهها وبصريح العبارة اكرهها .. وبصريح العبارة أكرهها وما أتمنى انه اكون جنبهم حتى بالخطأ والصدفة ..

هذول الاربع بنات أذوني وأذوني طول هالثلث فصول ، مشاكل شقد تسببوا لي فيها،واني سكت عنهم واجد .. بس ما دامهم قاموا يتكلمون قدام العالم كله .. فأني نفس الشيء .. أذكر اسمائهم ، وطبعا الي اخلاقها زفت والي افعالها زفت والي تصرفاتها زفت والي افعالها وياي كلها مفووشر ورياء .. انتو عارفينهم وعارفين اطباعهم ..فما يحتاج افصل فيها اكثر. .

حبذا لو هم يفهمون هذي الصورة عن نفسهم، يشوفون نفسهم وين واصلين، ألى اسفل السافلين ..

على كل الي سويتوه وياي ما راح أأذيكم ،لأنكم ما تستحقون أحد يعطيكم إهتمام ، بس حبيت أوضح لباقي البنات إنكم هالكلام الي تطلعونه ،أولا بنطبق عليكم لأنكم تسونه وتقولونه عن خبرة ، ثانيًا مثل ما إنتوا وصلتوا للعام فراح أبدأها وانهيها في العام ..

بأفعالكم هذي كنتوا تفكرون انه البنات بصدقون كلامكم وبيبتعدون عني ، بس هه ولخيبة حظكم بدأوا يبتعدون عنكم انتو ..

أمممم هذا الموضوع كان رئيسي بهذول الثلث فصول، كل ما بين يومين ينفتح وأصبر..

أما الشيء الأكبر فكان مرض أمي .. لأني ما لي غيرها بالدنيا ،ولو العالم كله تركني ما بتأثر بس غيابها عني يحطمني ..فعشان جذي نفسيتي كانت صصصفر والإمتحانات نوعا ما أراجع ليها ..يعني كانت دراستي سطحية ، والإمتحانات مستواها أصعب من انه الواحد ما يدرس بشكل اقوى من جذي ..

اني ما همتني الدراسة بكثر ما همتني صحة أمي .. ولما تجتمع المشاكل تجتمع مرة وحدة .. !

كنت منشغلة بأمر أمي لآخر حد ، وسخافة الرسائل الي انرسلت لبنات صفنا نسيتتها وكلما انساها يذكروني فيها ..

أني بشر حالي حال اي شخص بيتأثر وبيتضايق ويصيح ، لكن كنت أكابر واضحك واقول لكم اني ما افكر بهالأمر ابدًا ،وأني ما راح عن بالي .. وكل يوم انصدم بأن عدد الرسائل يزيد ! لكن كنت أضحك وقلبي من داخل منكسر ..

ما أحد في الدنيا كان يقدر يحمل ثلاث هموم ، هم مرض امي وهم الدراسة وهم هالرسائل .. فأوكي كنت أثق بكلام صديقة عزيزة على قلبي بأن المشكلة الي ما لها حل ،تنحل بروحها ، وإنه كلما أسكت وأتغاضى عن المشاكل الأطراف الثانية تموت تقهر ..

بهذي الأيام علمتني الحياة أشياء واجد ،قبل كنت أضن انه خلاص صرت فاهمة الحياة ،وانه اني اكثر وحدة ماخذه تجارب منها وانه لي القدرة على مواجهه كل شي بس بهالأيام حسيت نفسي ما أحمل ولا ذرة قوة، مو لأني كنت أصيح واجد،لأنه ما كان في إيدي أسوي ولاشيء!

اللي اعرفه أكثر الحين ،انها الحياة صعبه، الحياة مو اكل ونوم وحياة يومية،الحياة أكبر من جذي، الحياة مواجهه وفي المواجهه القوة ، والحياة دموع وفي الدموع إحساس .. والحياة خبث ومن هالخبث أشرار ..

أمممم فهذا الي شاغل قلبي ..

أما الإمتحانات..

فأول إمتحان كان عدنا طبق .. الإمتحان حليو وسهل، وكنا عادي واحنا نسويه حتى انه نقول لبعض ملاحظات على المسافات وجذي ، كانت تراقبنا معلمة نعيمة وكانت تلمح لنا لبعض الاشياء، وبعد وياها معلمة أمل المطاوعة ، شكلها ما كان طبيعي ،كنت أحسها انه متضايقة ، هي عادة اذا شافتني دائما تتحجج وياي ، في آخر الوقت كنا نسولف ومدري شنو، فجت لي وبمزح قالت لي سوي الإمتحان عدل لا اشتكي عليش عند معلمة معصومة .. فقعدنا نضحك ،بس بعد مادري كنت أحسها متغيرة ومتضايقة وحتى ملامح وجهها كانت غير ..

المهم في نفس اليوم كانت امي سافرت للحج .. وكنت كلحين اتصل لها واقول لها تهتم بنفسها وأنه الطواف والسعي تقعد على الويل جير .. ووصايا ووحاله لأنه هي كانت تعبانه وبعد الحج يبي له قوة .. فكنت خايفة عليها واجد ..

اممم بيوم ثاني كان عدنا إمتحان اكاونت ، كنت شوي مزكمة وجذي، فكملت الإمتحان وهو شوي صعب تقريبا نفس أسئلة الجامعة ، فكرة الإمتحان حلوة ،بس خسارة كان عندي بعض الاخطاء، اممم بعد الإمتحان رحت لمعلمة أبرار وسويت وياها الإمتحان كله صح ، واني اسويه وياها سويته صح بس بالورقة خطأ ..

معلمة أبرار روعه أحبها عدل ، ذاك الفصل وهالفصل كانت وياي ودائما تنصحني وتوعيني بأشياء غافلة عنها ، وكانت تساعدني واجد عشان آخذ مواد ذاتية ويقبلونها لي التسجيل ، وهي للحين على استعدادها انه تخليهم يقبلون تسجيلي بهالمواد .. كنت اتمنى أجازيها بردجات عالية بس خسارة L حتى بأبسط شيء ممكن اقدمه لها ما قدرت ..

بعد ما طلعت من الإمتحان شفت البنات يصيحون وحاله ،بس اني اوكي كنت احسه سهل ،فتماشيت وياهم بأنه صعب وجذي .. ماليّ خلق يقولون ليّ ما تحسين فينا وراعي شعورنا ومدري شنو ، خوب أني اذا عندي إجابه خطأ يقولونها لي في الوجه ، اما اذا غيري اجابته خطأ فلازم التزم سكوتي واقول لهم اجابتكم صح .. لازم أراعي شعور غيري وما أحد يراعي شعوري ..

بعد هاي الإمتحان كان عدنا امتحان دين وكان سهل حده،بس شوي خطأت بسؤال ان شاء الله ما يحاسبون عليه واجد.. طبعا إجمالا الكل قال الامتحان سهل .. من العلمي والأدبي والتجاري ..والحمدلله على كل حال ..

وصلنا لأيام العيد وبفررح كبير بأني راح استقبل العيد وبنطلع وبفتك من جو الإمتحانات .. كنت فرحانة ، ويوم جه يوم العيد ما أدري شلون من أول ما قعدت حسيت روحي ما لي خلق العيد ! فقلت يلا يمكن من لأني قاعده من الصبح فهاي تأثير النومة.. المهم اول شي رحنا بيت خالتي وبعدين بيت بابا علي ، واول ما وصلناااا! إنكسر كعب انعالي .. أمبيييه انقهرت عدل عدل فقلت اوكي يمكن لأنه كنت ارجع عليه وحاله ، عقب الغذى رحنا مجمع الدانة ولعبنا الجهالو اهناك ، وفي طلعتنا كنا موقفين السيارة في الباركات الي بره ، واحنا نمشي طاف علينا تعوسي نحوسي سعودي غبي وفتح الدريشة وفلت جقارته ،/ طارت هالنحاسه على دفتي واحترقت من تحت اني شفت شراره على يساري قلت انه اياها الجقارة وما دريت انه الجقارة على دفتي . . وانقهرت عدل عدل عدل ،، إي صحي واحنا نازلين للمجمع انقصت السلاسل الي في شنطتي فاضطريت انه اتركها في السيارة!!!!!!!!! يعني مأساة كان

في الليل رجعنا بيتنا ، واحنا طالعين من بيت بابا علي احسهم متضايقين وجذي ،قلت احتمال تعبانين ، وحتى منى اختي شفتها متضايقة وعلى اغلب الضن انها صايحة ، فطوفت هالموقف ،واحنا في السيارة كلحين منى اختي تتصل وما يردون عليها ،حتى بغت تدعم ابنا لو ما الله ستر وامينة مادري شسوت وصرنا عدل .. ويوم وصلنا البيت بسلامة عمرنا اختي منى راحت المجلس وما اسمعها الا تصيح وتصارخ وتقول وش فيها امي ومدري ويش وعنايه وحال .. خفت لا شعوريا صحت .. وتركتهم ورحت فوق اصيح واني ما أدري شسالفه كل الي اعرفه انه امي مريضة وفي العناية .. ويوم ثاني كل واحد يتصل من صوب وكل ما اسالهم يقولون لي كلام غير واحد يقول لي انه في العنايه والثاني انه طلعوها واحد يقول لي شالواالاكسجين والثاني يقول لي لا .. ليما المهم بعد حاله من هالمعاناة الكبيرة كنت خلااااااص ما عندي اي احتمال اسمع اخبار ثانية ، كنت بس أصيح وادعي لأمي ، كنت محتاااجة احد أتكلم وياه أي أحد أي أحد ، وكل الي بالبيت كافيهم همهم ، وصديقاتي يا حيف مشغولين برسائل سخيفة ويجون يوصلون لي أخبارها ..

يعني كانت اياااام ما تنسى ، أيام فعلا حسيت نفسي وحيدة وحيدة ! / المهم بعدين رجعت امي يوم الجمعة توقعت انها بتقعد بالبيت لانهم قالوا لي انه صارت اوكي وجذي ، بس ما صار لها حتى ساعتين الا ورجعت المستيفى وترقدت ، واني صدق صدق حسيت نفسي مت خلاص ! ! والأزيد من جذي يوم جت امي اشوف في جسمها بقع غريبة بنفسجي واخضر ودم وحاله وجهها متغير وجسمها كامل ، ! قااااااااالت لي ويااااريتها ماااا قالت ، قالت لي انه سوو لها عمليتين ، عمليتين يا ناس واني ما أدري عن امي .. انذبحت ازيد واني اسمع هالخبر واني اشوف محلها خالي وهي في المستشفى ..

يوم الاحد رحت المدرسة وعدنا إمتحان او بي ، ما اجذب واقول لكم راجعت، ما رراجعت الا هرار اتصفح الأواراق واني مادري شفيها ،ورحت يوم ثاني على اساس براجع ،وكلشش أحس روحي ميتة ،اتصلتلي منى اختي تقول لي انه امي زينة ،فما ادري ليش قعدت اصيح كنت احس انها تقص علي ،لانه من تقول لي زينة معناها انها عكس جذي ، يالله والله يعني مأساااااااااة وما كان لي خلق أبدًا أبدًا والبنات يفكروني متضايقة على موضوع الرسائل ، اني مجنونة اخلي بالي ويه هالسخيفين .. قدمت الإمتحان وأشوى يعني كان سهل، بس اشياء واجد ما اعرفها ،كتبت الي اتذكره من شرح معلمة لمياء وسيدة طلعت ،حتى ما كان لي خلق اتصفح الورقة أكثر ، ولا وجنبي هالسخفين بعد!!!! كانت تراقبنه معلمة أميرة ولاحظت عليّ انه متضايقة او مريضة ،والله واني بس اقول كلمة امي كنت اصيح اتذكر حالهااا واصيح ..

طلعت من الإمتحان على طول رجعت البيت ،كنت بروح لامي بس منى قالت في العصر بنروح كلنا وانه حالتها تحسنت واجد واجد .. يووم رحت اهنااااااك والله قلبي حسيته ما ادري ،خاااااطري اصيييييييييييييييييح واصاااااااااااااااارخ ، والله ما صدقت عمري واني أكلم أمي . .

بعدين بدأت تتحسن حالة أمي ،وعقب رخصوها يوم الأربعاء أو الخميس .. أرتاح بالي واجد واجد واجد واني اشوفها بره المستشفى ,,

المهم عقب صار عدنا امتحان السفر اني درست وكملت وشرحت للبنات ،بس الإمتحان كان صعب ، وخربطت فيه ، قصدي ألفت فيه ..لانه الاسئلة أول مرة اشوفها وادري انها بالكتاب .. راقبتنه معلمة بدرية .. قبل الا متحان ما ينتهي قلت لها بطلع،وعطيتها ورقتي الا تسوي لي ما توقعتش بتطلعين الحين وكلش كنت معصبة اني فقلت لها لانه اسئلة الإمتحان ابداع فسويتها

عقب إمتحان السفر كان عدنا عربي ، الامتححان كان سهل واجد،بس من كثر ماهو سهل خربطت في سؤالين ، الأول كان العلاقة بين شطرين واني اقرا السؤال جاوبته في بالي ،كنت اقول بين الشطرين مقابلة وبين البيت الاخير والاول نتيجة لسبب ، وكتبت الاجابه الخطأ واتباعدت عن السؤال ، والخطأ الثاني كان في الاعراب ،المفروض بدل واني خليت مضاف إليه .. يعني بكون ماينز 3 ، والتعبير ان شاء الله ما ياخذون عليه واجد ..

بعد هالإمتحان اممم عدنا عدنا سكر ، الامتحان فن بس بعد خربطت فيه ..

وعقب هالإمتحان كان عدنا انج هههههههههههه ، الامتحان صعب حده حده ، قبل لا ندخل الإمتحان رسلنا مسج لمعلمتنا نقول لها ادعي لنا ، واتصلنا ليها فطلع انه مبندة تلفونها ، انزين ،بعد الإمتحان كنت منقهرة وجذي فاتصلت لحسين اخوي عساس يجي لي بس طلع انه كمل الامتحان ورجع الشغل ، المهم ، احنا طول ايام الامتحانات نقعد في كبينة اسمها قلوب، هالكبينة مقفولة فما يصير ندخلها ،وامون اختي اللعام كانوا يقعدون اهناك ومحد يدري ابهم، المهم احنا بعد كنا نقعد اهناك ونشقح من الدريشة ، ففي امتحان الانج كملنا ورحنا اهناك، انزين فكنا قاعدين اني وفطوم حسن وودداعية ،الا شفنا فوزية طايفة وهي تصيح فشي طبيعي انه احنا نروح لها ونسكتها ، لانه تصيح على الامتحان وهو ما يستاهل دموعها ، المهم واحنا قاعدين نشقح من الدريشة شافتنا المديرة ونادتنا ، فعدنا نضحك وجذي وقلنا لها انه احنا نقعد اهناك وندرس وفي هذي الاثناء رن تلفوووني ، ياعلييييييي انقلب وجهي ، والله كنت في بالي اقول من هاليمتصل وورطني ، فقبل لا اعطي المديرة تلفوني شفت الي متصل معلمة عفاف ، هههه وتذكرت انه كانت واعدتنه تتطمن عليها بعد الامتحان ، فاخذت المديرة تلفوني ، وبييه ياعليييي اول مرة امشي بدون تلفوني ، تضايقت عدل بس ما بينت هالشيء فكنت اضحك ، يوم رجعت البيت ، خوووب ما وصلتالبيت الا اهم الادارة قايلين لبيتنا ، ويوم رحت البيت استقبلوني بالصراخ ، وامي تسوي لي خواتش واخوانش كلهم كملوا المدرسة ولا يوم احد اتصل يشتكي عليهم اما اني فعلى طول مشاكل ومدري شنوو // والله حز في نفسي هالكلااااااااااام ، بس والله مو بيدي ،فكنت اصيح وبعد اضحك واني ابرر موقفي ..

الي كسرني انه امي تسوي لي مافيه تلفون ثاني ولا احد يروح ياخذ تلفونش .. اففففف فهني اني نوي وي اعيش بدون تلفوني ..

هههههه امون اختي رافت بحالي وعطتني تلفونها طول اليوم ، المهم عقب هالامتحان عدنه قصد ،الامتحان كان صعب بس يالله سويت فيه افضل مما توقعته ، وطلعت من الامتحان واني متضايقة ، على تلفوووني ، قعدنا صوب الكفتيريا انزين والبنات يسولفون واني قاعده اشقق الكتاب، يفكروني على الإمتحان واني على التلفون .. اممم أنزين جتني الصيحة واني اقول ليهم انه امي سوت لي جذي ، بس والله ما في احد بالدنيا يتجنب المشاكل كثري، والله المشااااكل تجي لعند رجولي .. كل وحدة اكبر من الثانية،خليت الناس كلها وما تصيدني المواقف الا اني.. والله من قلب كنت أصيح ،هالثلث ايام حسييييييتهم بيييه كأنهم دهر ، وفي امتحان ا لريض ما راجعت عدل لانه كنت احاتي روحتي للمديرة وشلون بقول لها امبي تلفوني وشلون بكون موقفي اذا رفضت تعطيني اياه الا الفصل الثاني ،المهم راجعت كامل الا الوحدة الاخيرة لانه ما حضرت ولا درس ولا درس ، فكنت ما افهم شيء جد يعني ما افهم ولا حرف،جت فوزية بتشرح لي بس ما كان لي خلق ولا استعداد افهم شي ، فمسكينة راحت عني وهي الي جايه تساعدني .. دخلت الامتحان وسويته كامل ما عدا اسئلة الوحدة الاخيرة كان فيه سؤالين واثنينهم خطأ .. فأوكي قلت ما علي من الامتحان ،ويوم طلعت من الامتحان الكل الحمدلله مسوي زين ، بس اني صراحة ما سويت عدل،وقلتلهم اي سويت زين ..وكنت خايفة عدل على تلفوني .. ههههه ما كان عليي من الامتحان كثر تلفوني ..

المهم جت اختي منى للمديرة جدي الساعه9 وصراخ وحالة وقالت لها المديرة انه المشرفة الحين مو موجودة وانه بتسلمها التلفون الفصل الثاني نهايته ..

انزين فيوم كملت الامتحان بعد جت اختي منى وهالمرة راحت للمشرفة ، وكانوا ثلاثهم اهناك ووياهم الدكتورة وبهدلتهم تبهدل ، طلعت الاخضر واليابس ، وقالت لهم اذا ما رجعتونه بتكتب في الجرايد عن سوالف المدرسة والتلفونات والحالة وبنات آل خليفة ومدري شنو هرار واجد حتى اني خفت من منى !!

بعدين خلوني اكتب تعهد انه ما اجي التلفون وانه ما ادخل صفوف مقفلة عبر النوافذ خخخخخ .. وعطونه التلفون وطلعت ..

اممممممم واستانست عدل عدل عدل والحين اجازة ومافي مدرسة وافتكينا من هالمواد وافتكيت من مقابل وجوه هالبنات الي اكرههم ،وافتكيت من قعدة الصبح ..

خخخخ باقي هم النتائج والله يستر منهم ..<== مقررة ما أخذ النتيجة ، بس نفس الوقت خاطري اعرف درجاتي .. يله الله كريم ..

الحمدلله انه انتهى هالفصل واني للحين عايشة ,,

وشكرا لكل الي وقفوا وياي ..

مشكورين ورحم الله والديكم والله يوفقكم..

شكرا لفاطمة حسن وفاطمة الوداعي وفوزية وداد ورحاب ورباب حماد ورباب الزنجي وسماح وجنات وليلى هلال وفاطمة علي وفاطمة عبدالله وهاجر وزينب حبيب وفاطمة زكريا وفاطمة درويش ومعلمة معصومة ومعلمة أبرار ومعلمة أميرة ومعلمة رزان ومعلمة فوزية وشكر لصديقتي الغالية زينب علي..

شكرا لكل الي كانوا معاي وما تركووني ..

الله يوفقكم

أختكم /

زينب J

أيام مضت ..

Mon, 20 Nov 2006 16:58:08 GMT

السلام عليكم ..

فترة طووويلة مضت وأنا لم ازور مساحتي ..

كانت اكره فترررة يمر بها جميع الطلاب..

إمتحانات المنتصف!!!! ويا لها من فترة!

ما أحب أذكر هالأيام لأنها تعب × تعب ... ويا ليت طلعت بنتيجة عدلة ..

درجاتي :

دين 20

عربي 20

سكر 20

اوفس براكتس 20

قصد 19

انج 19

أكاونتج 19 ونص

طبق 20

ريض 20

سفر20

خوب المواد الي توقعت انه باخذ فيها علامات كاملة وأكيد أكيد ، كانت القصد والأكاونت ، بس مادري شلون هم الي نزلت فيهم ..

الحمدلله على كل حال ، كانت النتائج مرضية والحمدلله ، بس بعد كنت اتمنى أفضل..

أممم حالي ويه صفنا مثل ما هو .. مشاكلنا من أول يوم دراسي لحد الحين مستمرة ! والسبب مرة 2 الصبيان ..

المهم ، على كييييييييفهم ، والله لا يسامح أي وحدة ظلمتني وحاولت تشوه سمعتي ..

أممممم ..

اليوم لما كنت بكتب بلووق جديد كنت بكتبه لغاية معينة ..

أولاً ..

أنضم فرد جديد لعائلتنا الكريمة مصحوب بالصلاة على محمد وآل محمد -------> مولود جديد وهو سيد حسن ..

ثانيًا ..أمش الأحد بدأت في شرح قصيدة الفرودس المفقود .. من البداية وأني أشرح في المقدمة كنت احس في الصف ركوود غير طبيعي .. فقلت ما عليه يمكن من إسلوبي في سرد المقدمة كان ممل .. مع انه كنت احسه عادي ومقارب لأسلوب معلمة أميرة ..

وأني أشرح كنت أتذكر ملاحظات معلمة معصومة .. وأحاول أطبقها .. ويعني كملت الحصة الاولى وأني مو مصدقة بأن الصف صفنه !! صمت غير طبيعي ..

فلما رجعت البيت بدأت أحضر من جديد على امل أنه أخلي الصف يكون أكتف أكثر ..

جينا يوم ثاني بالحصة الثانية ، دورت كتابي العربي ما شفته ، كان فيه الاسئلة وكل شيء كنت بشرحهه كان بالكتاب ..

فلما جت معلمة أميرة قلت لها انه كتابي نسيته ، واخذت كتاب بنية من فرقة 6 .. وبعد قلت لها انه ما قاعده أذكر كل الاسئلة الي حضرتها .. فقالت لي أوكي ..

المهم بدأت بالشرح .. ويا ليتني ما بدأت ، سوالف وضحك ، والي تاكل ، والي تدرس للاختبارات ، والي تعلج .. يعني أبدًا ما كانوا محترمين وجود المعلمة .. مو مهم انهم يحترموني ، بس على الأقل احترامهم للمعلمة ، وللحصة نفسها ..

أستغرب من البنات الي يقولون نحب حصة معلمة أميرة وأفعالهم تكون جدي ! .. والله بنات مثل العسل ما توقعت انهم يكونون جدي ..

وفوق هذا بالغصب يشاركون .. !

كان بإمكاني اني اعاقب البنات ، بس شقول للمعلمة اقول لها وقفتهم لانهم ياكلون؟ جدي أصلا بحرج المعلمة وبحرج نفسي زيادة، لانه مخلية ثقتها فيني باني اششرح الدرس وأسيطر على جو الصف ، بس هي على الاقل المفروض تنتبه لهم .. !

انقهرت عدل ، في كل سؤال اسأله اشوف نفس الأصابع ، وأحيانا بدل ما تزيد تقل .. كل سؤال سألته تمنيت انه ما قلت بشرح ..

مو لاني ما أعرف أشرح ، بالعكس كنت مجهزه أسئلة حليوة ، ومقتبسة من الكتاب ومن بعض الدروس الي خذناها في عرب 102 في درس جمال الطبيعة ..

المهم .. كملت الحصة وبلعت كل اللي صار ..

ولما رجت البيت قعدت ادور كتابي العربي وما شفته ..

فأتمنى انه ما يكون مقلب مسوينه فيّ البنات .. لأني أصلا متأكدة اني مخلية الكتاب في الشنطة..

بس ما عليه ببني على حس نية وبقول انه ضايع ..

على العموم أتمنى للجميع التوفييق ..

زينب ..

أيام العيدـ اليوم الأول ـ

Tue, 24 Oct 2006 22:41:27 GMT

السلام عليكم ..

عيدكم مبارك .. وأيامكم سعيدة إن شاء الله ..

بصراحة هذا العيد واجد واجد واجد واجد حليو .. أشياء واجد حليوة صارت وأولها اتفاق العلماء الشيعة لأول مرة في أن العيد يوم واحد ، وخصوصا قرية جدحفص .. وأكيد وجود عمي بينا كان حليوو ،لانه صار لنا كم سنة وهو دايم يكون بالعمرة او في الحج وما يكون معانا بالعيد ..

وهناك بعض الأشياء المهمة ، والي اعتبرها البعض جريئة مني .. بصراحة كنت صدق مستانسة اليوووم ..

امممم ليلة العيد تقريبا ما نمتها كلها ، لانه طول الوقت كنت أسولف ويه أمون اختي ونتذكر الأعياد السابقه ،ونرتب طلعات العيد وجدي يعني .. وتالي ننام ..

فاليوم قعدت تقريبا الساعه 9 وسبحت وأكيد اكيد لبست ثياب العيد ، وتعدلت وهرار يعني ، ونزلت أعايد أمي وإخواني ، كنت فرحانة من اول ما قعدت ، لاني صبحت بوجه حموودي وحسووني ، كانوا حليوين عدل واهم جايين يعايدوني ، .. وكانت الأجواء في بيتنا حليوة ، فحليو حليو واجد ، وتالي بعد رحت بيت أخوي أحم احم صار عدهم بيت ، فقدعت اهناك ، وتالي قدعت في بيت اختي ، وتالي بيتنا ، كنت مستانسة واجد كلنا متجمعين ، كان خاطري انه عبود وهنادي وعمران يكونون معانا ، وبس ..،

وزرررررررررنا الأهل اللي ما نشوفهم الا نادرا . . وتالي رحنا بيت خالتي زينب ،وقعدنه اياها للأذان وبعدين رحنا بيت بابا عود .. واهناك خالاتي وبناتهم وجهالهم وأولادهم .. طبعا أحليوة اللمة وكل شيء ..

تغذينا والحمدلله وبعدين قعدنه نسولف ،اممم تقريبا الساعه 4 رحنا مجمع البحرين، أني وأمون ودعاء وحوراء وزهوور وزهراء ،وطبعا الي تسوق السيارة حوراء .. فكان الوقت ممتع انه احنا طالعين بروحنا ،وفن يعني ..

رحنا مجمع البحرين قدعنه ندخل من محل الى محل ،، خخخخخ مسوين نفسنه عاد في قيود الزمن ، المهم ، تالي كل وحدة أخذت لها أكل وأيسكريم وهرار ، ورجعنا البيت دايركت ..

في المغرب صلينا ، وجه حسين أخوي في باص الشغل ، وقال بطلعنا ، في البداية تكنسلت الطلعة لأنه بنت خالتي مريضة ، وكنا نبي نروح كلنا جميع ، واحنا بعد شوي تعبانين ، فبعدين صارت زهوور أحسن ، ورحنا الكورنيش ، الجهال لعبوا واحنا قعدنه جنب البحر ، أني وامون وزهراء ودعاء ،وقعدنه نسولف عن ظهور الإمام المهدي عجل الله فرجه ـ وتالي انفتحت سالفة الدراسة والمدرسة والمعلمات ،والجامعة ، يعني .. كل وحدة كان لها رأيها .. مع انه كل وحدة كانت تقول شيء مختلف، لكن بالنهاية كل الكلام الي قلناه مفيد ، وكل وحدة استفادت من كلام الثانية .. L

يمكن كنت أني أصغر حلم او طموح كان لي ، فأني على طول قلت لهم أتمنى أدرس أكاونتج ،وتالي أكون مدرسة مواد تجارية ، سواء أكاونت أو أي مادة تجارية ، فكانوا يسخرون من هالشيء لكون المعلمات الحين تارسين الديرة ومستحيل أتوظف .. بس اني مقتنعة بنفسي وبالشيء الي أبي أوصل له ، ولكل مجتهد نصيب ..

رجعنا بيت بابا عود ، وتالي رحنا احنا البيت ، احسين اخوي كان يبي يعشينا بس ما كنا مشتهين شيء مع انه اني وامون ما اكلنا الا مكسرات وأيسكريم ونفيش طوول اليوم .. ولما رجعنا البيت علي اخوي بعد يبي ياخذ لينا ميلز من جسميز ، وقلنا له خل يخليه لبكرة ..

أحين جيت بنام / بس قلت خل أكتب الاشياء الي سويتها اليوم ، لأنه هذا اليوم احلى يوم بحياتي . . وأحلى عيد مر علي ..

أممم بكرة يمكن منى اختي تطلعنا وتسبششلنا بطلعه حلوة مثل ذاك العيد ..

في النهاية عيدكم مبارك .. والله يجعل أيامكم كلها أعياد

أكيد في أشياء ثانية صارت حليوة ، بس خلها لمرة ثانية أكتبها .. بعد فترة :> ..

أيام كريهه ..

Thu, 19 Oct 2006 20:48:25 GMT

السلام عليكم ..

لعلي هذه الفترة أصبحت اتظاهر الضحك والفرح .. إلا أنني من الداخل أتألم على حالي ..

فعلاً .. الآن بدأت أحس بالوحدة بالرغم من وجود الجميع معي ، وخصوصا من أحبهم ..

ولكن ! لا أدري لماذا أصبحت أخجل أن أفضفض لهم ما بقلبي ، أحداث مرّت عليّ ،لو مرّت على الجبال لكسرت شموخها ..

لكني بقيت صامدة ، على أمل أن يتعدل الحال ..

حتى مساحتي هذه لم أحبذ أن أكتب فيها كثيرًا ، لأني لا أريد الجميع أن يعرف مابي ، أنا أكتب هنا كلام مبهم ، وان عرفتم بعض الشيء منه إلا أنها ليست الحقيقة كاملة ..

أنا أحببت مساحتي هذه ،وحتى المساحة السابقه ، فحين أحس بأني لابد ان أرمي بعض ثقلي ألجأ إليها ..

الآن ، لا أدري ، أصبحت بعيدة عنها ..

أصبحت أنا زينب القاسية كما وصفني البعض ، حين علموا بأني قطعت علاقتي مع بعض الزميلات لي .. أنا لست قاسية ، ولكنني لا أحب هذا الصنف من البنات ، أكره من تستغفل أهلها .. وطبعا هناك أسباب أخرى وكثيرة جعلتني أقطع علاقتي بهذه البنت ..

الدراسة .. لعلها شاغلي وهمي الأكبر الآن ، لا أخفي عليكم ، أنا الآن راضية عن أي درجة إختبار حصلت عليها ، وخصوصا الدرجات الغير كاملة ، لأني أدرس بما فيه الكفاية لتقديم الإختبارات ، ذاكرتي تسعفني كثيرًا ، أما أنني أخصص وقت لأحفظ فلا وألف لا .. لأنني لا أحب الحفظ ، أحب الفهم والاعتماد على ذاكرتي وبالتأكيد التأليف المقارب لمحتوى الكتاب.. أحببت دراستي لهذا الفصل بالرغم من صعوبة المواد ، أحب أن أرى نفسي أتعب لأجل الحصول على معدل أنا أرضى به .. أحببت سعي لدراسة المواد ، وإعداد التقارير والواجبات ..

قد تروني مهملة في الصف ، لكن وقت الإختبار وتصفحي للكتاب هي طاقتي كلها في الدراسة ، ذاكرتي كما قلت تسعفني دائما ، والحمدلله ..

وجانب آخر هي أنني الآن في صدد الحصول على مادتين ذاتي ـ العربي والمحاسبة ـ أتمنى الحصول عليهما هذا الفصل ، فأنا مشتاقة لأن أعوض درجاتي التي خسرتها ظلما ..

بسنا من الفصحى :> ..

على العموم أحب أذكر للكل أنه أني أدرس واجد واجد ، ـ وأحضر ـ وليس من المهم أن أشارك بالصف أم لا .. فالعبرة بالنهاية ..

ـ سوري ما أقدر أكمل البلوق لأنه أشياء واجد مضايقتني ،ولو بتم أعدها ،بضيق خلقي وبصير أكره أدخل السبيس ... ـ

فخلها بالقلب تجرح ولا تطلع لبره وتفضح..

لـم تـكـن الـدنـيـا كـمـا أحـب

Thu, 05 Oct 2006 20:21:27 GMT

السلام عليكم ..

قدري ! ..

لعلك أوقعتني في أقسى لحظات حياتي ..

خدعتني ..

خدعتني لمدة طويلة جدًا ،،

جعلتني أرتبط بأناس أحببتهم بقلب ..

قد أحبوني فعلاً ..

لكن ..

أتيت أنت وبدأت بتفكيك هذه العلاقات ..

خدعتني ..

جعلتني أندم أشد الندم ..

أفرحتني لمدة سنة كاملة ,, أما الآن

خدعتني ..

أوصلت فكرتك لي هذه المرة بأقسى من كل مرة ..

وجهت سكاكين غدرك في قلبي..

جعلتني أحلم بصديقات مثليات ..

خدعتني ..

كنت أضن أنك فارقتني لأني لم أراك في هذه السنة ..

فعدت ..

وخدعتني ..

لا أدري لماذا انت معي ..وتجعل أقداري كلها تعاسه

كنت أنت قدري المحتووم يا قدر التعاسة ..

هنيئًا لك بفوزك عليّ ..

إنتقامك كان قويًا جدًا ..

وخصوصا وإن كان من أقرب الناس لي ..

صديقاتي ..

حرمتني منهن في وقت مبكر ..

أبعدتهم عني وهم قريبون مني ..

لماذا ؟

لماذا أنا دائمًا ؟

في هذه المرة كانت لي عظة عظيمة ، فلمدة سنة كاملة كنت مخدوعه . . نعم ..

لأنني أبدًا ولن أحصل على صديقة ..

ولن أجد من أكون معها وتكون معي ..

ليت من يقولون عني بأني تعيسة يروني الآن ، يرون كيف تدق التعاسة أبواب قلبي ، كي تحطمني الأقدار قبل الفراق ..

ليروا كم من الألم حملت لمدة سنة كاملة ، كم من الدموع ذرفت لأجلهم ..

آآآآآه وألف آآآآآآآه على نفسي ، ظلمت نفسي بقلبي ، ظلمت نفسي بأحلامي ..

حطمت ما تبقى من قلبي ..

آآآآآآآآآآآه على قلبي ، إلى متى وهو يحمل عذاباته ، إلى متى سأواصل تحطيمه ، إلى متى سيحمل بين ثناياه المحططمة ذكريات حزينة ، ذكريات لأشخاص بلا عودة ..

أيقنت بأني فعلاً مرفوضة من الحياة ، ليتني أنا من أرفضها ..

كل الأبواب أغلقت بوجهي ..

لم يبقَ لي سوى القليل والقليل فقط ..

أعيش على أنفاسهم ، فإن رحلوا هم أيضًا ، رحل جسدي معهم بعد أن رحلت روحي مع الماضين قبلهم .

ليتني أنتهي من عذابات الدنيا ، ليتني ..

تعب كلها الحياة

Thu, 28 Sep 2006 16:25:53 GMT

السلام عليكم ..

صار لي إسبووعين وأني أرجع البيت وأني أفكر باللي يصير لي يوميا وبالمواقف الي ما تنتهي وياي .. !

أسئلة كانت في بالي بس مادري شلون أصيغها لكم ..

لما أروح أنام كل الاسئلة تحضرني ، كل المواقف أتذكرها .. ! طبعا كل المواقف المفرحة عندي والحزينة كلها تنتهي بشيء واحد إلا هو الصيااااااح ..!

فآخر تفكيري لما بنام يكون هذي الاسئلة ... هل البكاء ضعف ؟ !
هل الصمت أفضل من المواجهه؟
من لي؟ ! ولمن أنا ؟!

الأسئلة بالنسبة لي صعبه واجد / لأني مستحيل أحصل إجابة مباشرة عليها .. سوى هالاجابة ..

ببساطة ..( تعب كلها الحياة) ..

أشياء واجد في بالي ودايما أفكر فيها ..

أولها.. دراستي ..!

خايفة عدل من هذا الفصل لأنه موادنا صعبة ،وأني لازم أرفع معدلي .. مو عشاني ، عشان أمي وأمينة ومعلمة معصومة ومعلمة سكينة ومعلمة أبرار، وكل الي وعدتهم بأني أرفع معدلي ..

الإختبارات الي قدمتها (عرب وريض وسكر وقصد ودين والأكاونت والأوفس براكتس ) كلها أحس اني ناقصة فيهم علامات .. وعلى وجه الخصوص القصد ..

وبعد رمضان مباشرة راح يكون إمتحانات المنتصف .. وأني اذا اختبار قصير قاعده أخسر كل هالدرجات فما بالي بإمتحانات المنتصف ..

ما أدري ويش أسوي ، تعبت وأني أراجع وأحضر وأدرس وأكمل بهالتقارير والمعلمااااااات ولا يعبرون بشيء، لأنه بالنسبة لهم شي روتيني ،أما أحنا فالهم كله علينا ..

شيء ثاني ، علاقتي مع معلمة معصوومة بدأت بالعد التنازلي .. !

شيء أكيد انه بنصير بعيد عنها حتى لو التقينا فيها كل يوم ، في البداية لما قالت لي أمون ومعلمة فخرية بأن معلمة معصومة درستنا كورسين صح ، وأنه مو شرط تدرسنه مقررات العربي كلهم ، وحتى لو دررستني اياهم ، أكيد بتخرج وعقب علاقتنا وياها بتنقطع نهائيًا .. !

من بداية السنة للحين وكل يوم لما نروح نسلم عليها اني وفاطمة حسن ،كل الكلام الي بنقوله لها يختفي ، طول الوقت نبتسم وسلام ومدري وش ..يعني ما نتكلم مثل قبل .. !

امممم وبعد صار لازم نترك روحتنه ليها ،لأنه أصلا ما قاعدين نقول شيء ، نحرج نفسنه بنفسنه .. وغير هذا كله صفنه أي شيء يصير لي ، أي مكان أروحه لما أطلع من صفنه ،يربطونه مع معلمة معصومة ..

بحصة العربي أتمناها ما تجي ، لأنه كل حصة لازم يذكرون إسم ملمة معصومة ، ويحرجون المعلمة ، يعني أول ما تشرح المعلمة شي عدنه خلفية عنه ، سيده يقولون لها اي شرحته معلمة معصومة ، كأنهم يقولون لها لا تشرحين ترى مشروح لنا ، فهالأسلوب أكيد بيحرج المعلمة ، يعني هي ما جابت هالدرس من مقرر 101 او 102 ، بس البنات على هامان يا فرعون، أحيانا أحسهم يقولون جدي عشان يقارنون بين معلمة معصومة ومعلمة اميرة ، وهي مسكينة تكتفي بابتسامة وتثني علينا بأنه للحين نذكر شرحها ..

أني ما أتمنى انه تنقطع علاقتنه مع معلمة معصومة ، لأنها كانت لنا معلمة واخت وصديقة ولا زالت ، بس مانبي في النهاية نفقدها مع تخرجنا من المدرسة ، وتكون فترة وانتهت من حياتنا .

كلااااااااااام واجد بخاطري ماني قادرة أعبر عنه ، وماامبي الكل يقرأه ,,!

زينب

بعد العطلة

Wed, 06 Sep 2006 13:48:39 GMT

السلام عليكم . .

أمممممممممم . .

شخباركم ؟

مبروك للشعب اللبناني الإنتصار .. والحمدلله على سلامة نور الزهراء وبنت الجنوب وكل أصدقائنا بلبنان :) .. والله يرحم كل شهداء المقاومة ..

والله يخلي السيد حسن نصر الله .. أخرج لنااااا بحق رجال .. ورجال صدقوا . .

-----------------------------

أخيرا انقضت عطلة الصيف .. كانت مملة في البداية .. بس عقب صارت حليوة ..

سافرت سوريا وياريتني ما رحت .. وعقب ما رجعنا من سوريا قعدنا اسبوع وبعدين رحنا العمرة . .

وعقب رجعنا وقعدت أجهز باقي اغراض المدرسة ..

وفي 5/9/2006 رحنا المدرسة ..

طبعًا أول يوم بالمدرسة أحبه أعشقه . . لكن هذي السنة للأسف كرهته .. لأنه كل شيء توقعته وجهزت ليه وخططته بأنه راح يصير ، كله اختفى :<. .أولاً أنه صفنه يتغير مكانه واشياء فيه ، فتغيروا بعض البنات الي كانوا يزعجون بالصف ، وتم صفنا على ماهو ، وثانيًا الي هو الأهم والي كانت أفضل خطة فكرت فيها للدراسة ، أنه أكون بخطة ب مرة ثانية .. عشان أرفع معدلي وأفرح وبالفصل الثاني أتفرغ لباقي المواد الصعبة .. لكن تجري الرياح بما لا تشتهيه السفن .. فصرت على خطة ألف بالمواد الصعبة .. فبهذي الخطة ما راح تدرسنه معلمة سكينة مع انه كنا ننتظرها بشووق كبير .. وثالث الشيء والي كان مسيطر على عقلي طول فترة الصيف .. انه تدرسنه معلمة معصومة .. خساااااااااااارة كبيرة انه نفقدها بهذي الفترة ، بفترة انه تعودنا عليها، بأنه ننتظر تشجيعها لنا عشان نرفع معدلاتنا مرة ثانية ، كنا ننتظر أختنا ترجع لنااا .. بس للأسف خابت أحلامنه ، أو يمكن أحلامي أني بس ، الكل كان ينتظر جيتها .. بس أني ما يئست تميت انتظرهااااااا .. وكل شوي أروح ليها وأسألها .. والله العظيم كان عندي إحساس كبير أنها بتجينه ، مع انها كانت تقول لي ما بتدرسنه ، بس أني ما كنت أصدق ، كنت ما أدري شلون يعنيييييي . . جد والله انتظرتها لآخر الدوام ..:( ولما قالوا لي البنات انها تدرس فرقة سبعه ، كنت بروح بنقل ، بس بنفس الوقت ما أمبي أخسر صفنه والبنات ، وما أمبي أروح فرقة 7 لأنه هناك هدى ، ووجودي معاها مرة ثانية بنفس الصف ما بكون خير أبدًا .. لأني ما استحمل بنية بمثل هالأخلاق العالية مع تعاملها مع المعلمات .. وخصوصا انها هي الي جت وعرضت علي انه اغير وياها ، بس عناد فيها رفضت ..

لما رجعت البيت ، كان السؤال الأول الي قالوه لي .. مين تدرسكم عربي .. ! ؟ جتني الصيحة ، احترت شنو أقول ، فقلت ليهم احتمال معلمة أميرة .. وبس حاولت انه ما افتح الموضوع أكثر ..

باليوم الثاني ، رحت المدرسة ولما جت حصتين الأكاونت طلعت ويه فطوم حسن .. وبعدين رحنا الصف وشفنا معلمة أبرار واستانسنا .. عقب جه الارشاد ، وعقب حصة الريض .. أمممم أول مرة أحس براحه وأني أقول كلمة ريض .. لأنه تدرسنه معلمة مريم عبدالله ، ومثل ما سمعت عنها انها طيبة وتشرح عدل وتحببش بالمادة ..

أنزين ، عقب الريض ، صارت حصة العربي .. انصدمت لما دخلت معلمة فخرية ، لأني توقعت بتكون أكيد معلمة معصومة ، وأول ما دخلت المعلمة فكرتها معلمة معصومة ، لانه معلمة معصومة بعد كانت لابسة حجاب اليوم .. فأول شي فرحت ، وعقب أنصدمممممممممممممممممممممت .. كنت خايفة عدل ، لأني ولا مرة سمعت صوتها ، خفت تكون مثل معلمة مريم الصباح هدوء بس لما تتكلم تهز الدنيا ، فأول ما سلمت كان صوتها هادىء . . ابتسمت لنا ، بس محد رد ليها الابتسامة ، كانت تتكلم إيانا بهدوء ، ملامح وجهها عكست شخصيتها تماما ، أني صراحة ولا مرة شفتها تصارخ أو حتى تتكلم ! . . فتفاجئت عدل ، شرحها كان حليو كأنه شرح معلمة معصومة .. أممممم كانت تردد إسمي واجد ، وسألتنه عن معدلاتنه ، . . طبعًا الحصة بالنسبة لي ما أدري شلون كنت أحس روحي كل شجاعتي طارت هوى ، فما أدري شلون .. كنت ألوم نفسي في الحصة أنه مسكينة المعلمة كل هذا حاملين عليها وهي بهالطيبة ، فحرام ما نتماشى وياها بالحصة ونشارك وجدي ، فأني أول مرة أرفع إيدي بحصص العربي على كل سؤال .. فكنت أمبي أحسسها أنه أحنا متفاعلين وياها ، وبعد البنات عقب ابتسموا وقاموا يضحكون على نفسهم لأنهم ما يعرفون الإجابة -à ناسين ..

أشياء واجد صارت بالعطلة و بهاليومين .. أتمنى تدوم في ذاكرتي .. ما حبيت أكتبها بالسبيس لأنه أكيد ما راح تنسى .. هذي بعض الأشياء الي صارت يمكن أنساها فكتبتها ..

أخيرًا .. كلمة أقولها لأستاذتي معصومة .. سأنتظركـِ ..

أختكم / زينب ..